काठमाडौँ । पर्यटन प्रवर्द्धन गर्न मर्स्याङ्दी करिडोरका पालिका एकजुट भएका छन् ।
बन्दीपुरमा केही दिनअघि मर्स्याङ्दी करिडोर अन्तरपालिका समन्वय बैठक बसी पर्यटन प्रवर्द्धनका लागि उनीहरू एकजुट भएका हुन् ।
मर्स्याङ्दी उपत्यका भित्र रहेका पालिकाहरू भानु, बेसीसहर, सुन्दरबजार, राइनास र पालुङटार नगरपालिकाका साथै आँबुखैरेनी, दोर्दी र बन्दीपुर गाउँपालिका संम्मिलित अन्तर पालिका समन्वय बैठक बन्दीपुरमा सम्पन्न भएको बन्दीपुर गाउँपालिका अध्यक्ष सुरेन्द्र बहादुर थापाले बताए ।
बैठकले करिडोर भित्र रहेका पर्यटकीय स्थलहरू जोड्ने सर्किट निर्माण गरी दीर्घकालीन पर्यटनको विकास र प्रवर्द्धन गर्ने गरी दोर्दी गाउँपालिकाका अध्यक्ष युवराज अधिकारीको संयोजकत्वमा पर्यटन उपसमिति गठन गरेको छ ।
उपसमितिमा राइनास नगरपालिकाका प्रमुख खड्ग बहादुर गुरुङ र बन्दीपुर गाउँपालिकाका अध्यक्ष सुरेन्द्र बहादुर थापा सदस्य रहेका छन् ।
समितिले आसपासका दुई वा तीन पालिकाको साझेदारीमा सरसफाईको तत्काल दीर्घकालीन समाधानका उपायहरू अर्को बैठकसम्म पहिचान गरी कार्यान्वयनमा लैजानेछ । साथै करिडोर भित्रका पालिकाहरू कृषिमा आत्मनिर्भर हुँदै उत्पादित वस्तुको एक आपसमा बजारीकरण, साझेदारीका कार्यक्रमहरू संयुक्त रुपमा अगाडि बढाउन बृहत छलफल र अन्तरक्रिया कार्यक्रम गर्ने लगायतका महत्वपूर्ण निर्णयहरू भएको करिडोर अध्यक्ष एवम् भानु नगरपालिकाका प्रमुख आनन्दराज त्रिपाठीले जानकारी दिए ।
बैठकले आगामी फागुन १२ मा बेसीसहर नगरपालिकामा तेस्रो बैठक बस्ने निर्णय समेत गरेको छ ।
कार्यक्रममा बन्दीपुर गाउँपालिका अन्तर्गत रहेका १७ पर्यटकीय स्थलहरू समेटिएको ‘क्युआर कोड’ मायाको चिनो स्वरुप बैठकमा सहभागी सबैलाई हस्तान्तरण गरिएको गाउँपालिका अध्यक्ष थापाले बताए ।
