काठमाडौँ । काठमाडौँमा रहेको वसन्तपुर दरबार क्षेत्रमा सधैँ आन्तरिक तथा बाह्य पर्यटकको अत्याधिक चाप हुन्छ । काठमाडौँ आएका मानिसहरूको पहिलो रोजाई हो वसन्तपुर । वसन्तपुर काठमाडौँको मध्य भागमा पर्दछ ।
यूनेस्को विश्व सम्पदामा सूचिमा रहेको वसन्तपुर दरबार क्षेत्रमा घुम्न आउने आन्तरिक तथा बाह्य पर्यटकको सधैँ घईँचो लाग्ने गर्दछ । यस क्षेत्रमा हरेक उमेर समूहका मानिसहरू आउने गर्दछन् । यहाँ आएका पर्यटकहरू आफ्नै उमेर समूहका मानिसहरूसँग मिठा र रमाइलो गफगाफ गर्दै वसन्तपुरमा घुमघाम गरी समय बिताउने गर्दछन् ।
यो क्षेत्र धार्मिक स्थलको रूपमा पनि प्रसिद्ध छ । धार्मिक आस्थासँग जोडिएका पर्यटक यहाँ आउँदा छुट्टै खालको आनन्द आउने बताउँछन् ।
हनुमान ढोकाको नामले समेत चिनिने यस दरबार क्षेत्रमा ऐतिहासिक तथा सास्कुतिक महत्त्व झल्काउने मन्दिरहरू समेत छन् ।
वि.स. २०७२ साल वैशाख १२ गते गएको विनाशकारी भूकम्पका कारण जीर्ण बनेका भवन तथा मन्दिरहरू मर्मत गरी रंगरोगन समेत गरेर अहिले उक्त दरबार क्षेत्रको मुहार समेत फेरिएको छ ।
विभिन्न समयमा हुने विभिन्न खालका पर्व तथा जात्राहरूले वसन्तपुरको रौनकता छाउने गर्दछ ।
वसन्तपुर क्षेत्रमा हनुमान ढोका, काष्ठमण्डप, कालभैरव लगायत अन्य मन्दिरहरू रहेका छन् । काठमाडौँ उपत्यकामा रहेका तीन शाही दरबार क्षेत्र मध्येको वसन्तपुर दरबार क्षेत्र पनि एक हो ।
