पोखरा । कास्कीको माछापुच्छ्रे गाउँपालिकाले मर्दी पदयात्रामा जाने पदयात्रीका लागि शुल्क उठाउन बनाएको सूचना केन्द्र व्यवसायीले आइतबार तोडफोड गरेका छन् ।
पालिकाले शुल्क उठाउँदा पर्यटकको संख्या घटेको भन्दै उनीहरुले हुमाल (हुक्याम्प) मा रहेको सूचना केन्द्रमा तोडफोड गर्नुका साथै कागजात पनि लिएर गएका गाउँपालिकाका प्रवक्ता गणेश आचार्यले जानकारी दिए ।
गाउँपालिकाले कात्तिक १७ गतेबाट मर्दी पदयात्रामा जाने स्वदेशी तथा विदेशी पर्यटकसँग शुल्क उठाउन सुरु गरेको थियो । गाउँपालिकाका तर्फबाट लोक्याम्पमा २ जना कर्मचारी शुल्क उठाउन खटाइएको थियो ।
गाउँपालिकाभित्र रहेका पदमार्गमा शुल्क उठाउने निर्णय हालैको गाउँसभाले गरेको थियो । प्रवेश शुल्क उठाउन गाउँसभाबाट आर्थिक ऐन २०८० पारित गरिएको थियो । उक्त ऐन अनुसार पालिकाले गत कात्तिकदेखि स्वदेशी पर्यटकसँग १०० रुपैयाँ र विदेशी पर्यटकसँग ५०० रुपैयाँ उठाउँदै आएको थियो ।
माछापुच्छ्रे मोडल ट्रेलका लागि मर्दी हिमाल हुमालमा र खुमैं–कोर्चाङ पदयात्राका लागि लुब्रकुमा गाउँपालिकाले शुल्क उठाउँदै आएको छ । पालिकाले शुल्क उठाउन सुरु गरेको पहिलो महिनामै १२ लाख रुपैयाँ संकलन गरेको थियो ।
तोडफोडबारे माछापुछ्रे गाउँपालिकाको विज्ञप्ति हेर्नुहोस् :
