काठमाडौँ । नागरिक उड्डयन प्राधिकरणले धरानमा विमानस्थल नबनाउने निष्कर्ष निकालेको छ ।
सुनसरी जिल्लाको धरान उपमहानगरपालिका क्षेत्रमा विमानस्थल निर्माण गर्न गरिएको विस्तृत सम्भाव्यता अध्ययन अनुसार सो क्षेत्रमा विमानस्थल निर्माण गर्दा विद्यमान हवाइ नीति विपरीत हुने भन्दै प्राधिकरणले यस्तो निष्कर्ष निकालेको हो ।
यसअघि धरान उपमहानगरका मेयर हर्क साम्पाङले विमानस्थल निर्माण गर्न पर्यटनमन्त्री सुदन किरातीलाई पत्र पठाएका थिए । पर्यटनमन्त्री किराँतीले पनि हतारिँदै धरानमा विमानस्थल बनाउन अध्ययन समिति गठन गरेका थिए ।
सोही समितिले अध्ययन पश्चात धरानमा हवाइ यातायातको दीर्घकालीन, नियमित र व्यावसायिक सम्भावना नरहेको तथा विभिन्न प्राविधिक र सञ्चालनमा आउने कठिनाइले विमानस्थल आवश्यक नरहेको निष्कर्ष निकालेको प्राधिकरणले जनाएको छ ।
हवाइ नीति २०६३ अनुसार तराइ तथा भित्री मधेशमा विमानस्थल निर्माण गर्दा कम्तीमा ४० नटिकल माइल हुनुपर्ने व्यवस्था रहेको छ । धरानमा विमानस्थल निर्माण गर्दा सोही नीतिको व्यवस्था विपरीत हुने भन्दै प्राधिकरणले मंगलबार सूचना जारी गर्दै यस्तो निष्कर्ष निकालेको हो ।
आर्थिक विश्लेषणबाट सडक यातायातको सहज उपलब्धता र त्यस क्षेत्रको भौगोलिक अवस्थितिका कारण ‘वान वे अप्रोच’ हुने भएकाले धरानमा विमानस्थल सम्भव नरहेको प्राधिकरणले मंगलबार जारी गरेको सूचनामा उल्लेख छ ।
