काठमाडौँ । गायिका सज्जा चौलागाईंले जुगल–५ हिमाल आरोहण गरेकी छिन् ।
आरोहीको एक टोलीसहित उनी गत मंगलबार विजयादशमीकै दिनमा ५ हजार ९२२ मिटर अग्लो जुगल हिमाल आरोहण गरेकी हुन् ।
चुचुरोमा उनले राष्ट्रिय झण्डा फर्फराउँदै ‘कलामा महिला’ स्लोगन लेखिएको एक ब्यानर पनि प्रस्तुत गरेकी थिइन् । हिमाल चढेपछि सामाजिक सञ्जालबाट खुसी बाँड्दै सज्जाले कलामा महिला सहभागिता बढ्नु जरुरी रहेको उल्लेख गरेकी छन् ।
उनले लेखेकी छिन्, ‘कला कुनै विशेषाधिकार होइन, यो एक अधिकार हो । मानव हुनुको आधारभूत भाग हो । ‘कलामा महिलाहरू’को आरोहण नारासहित सबै महिलाको प्रतिनिधित्व गर्न पाउँदा म धेरै खुसी छु । महिला भएको नाताले मैले सधैँ अरू महिलालाई प्रोत्साहन गर्ने र सकेसम्म उनीहरूलाई प्रतिनिधित्व गर्ने सपना देखेको थिएँ र मैले यो गर्ने मौका पाएँ त्यसैले मैले सक्दो प्रयास गरेँ । यो आरोहण सबै महिलाको लागि हो । म धन्य छु ।’
