काठमाडौँ । नेपाल पर्यटन बोर्डमा बेथितिको रजगज छ । बोर्डका कार्यकारी अधिकृत डा. धनञ्जय रेग्मीको मनोमानीले पर्यटन क्षेत्रको विकासका लागि योगदान दिनुपर्ने बोर्ड आफू र आफ्ना मतियारलाई पोस्नमै मस्त देखिन्छ ।
तत्कालिन पर्यटनमन्त्री योगेश भट्टराईलाई ‘चढाएर’ कार्यकारी अधिकृत नियुक्ति पाएका रेग्मीको अनियमितताले परकाष्टा नाघेपछि २ वर्षअघि छानविन आयोग नै बन्यो । त्यो आयोगले उनलाई अवकास दिने निर्णय गरेको थियो । तर, रेग्मी अदालत गए र स्टे अर्डर लिइ पुनः बहालीमा फर्किए । त्यसपछि उनको अनियमतिता थप बढेको त्यहीँका कर्मचारीहरू बताउँछन् ।
हालका पर्यटन सचिव दीपक काफ्लेको पनि निजामतिमा सेवावधि धेरै छैन । अहिले रेग्मी र सचिव काफ्लेको मिलेमतोमा थप अनियमित कार्य भइरहेका छन् । जसको पछिल्लो उदाहरण अध्यागमन विभागलाई ३ करोड रुपैयाँ दिने रेग्मीले गरेको निर्णयलाई लिन सकिन्छ ।
२ वर्षअघि काठमाडौंको चन्द्रागिरीमा भौगोलिक सम्मेलनको नाममा २० लाख रुपैयाँ यिनै रेग्मीले खर्च गरे । उनै रेग्मीले पर्यटनसित मेल नै नखाने भौगोलिक सम्मेलनको नाममा पोखरामा ६० लाख रुपैयाँ खर्च गरेका छन् । तर, बोर्डका कर्मचारीले त्यो रकम निकाशा गर्न नमानेपछि रेग्मी तनावमा रहेको श्रोतहरूको भनाइ छ ।
आगामी माघ १५ गते रेग्मीको कार्यकाल ४ वर्ष पूरा हुँदैछ । उनी कार्यकाल पूरा भएपनि विगतको कोरोनाको समयमा काम गर्न नपाएको भन्दै थप २ वर्ष काम गर्न पाउनुपर्ने अडानमा छन् । नयाँ कार्यकारी अधिकृत छनोटको प्रक्रिया सुरु गर्नुपर्नेमा पर्यटन सचिवसितको मिलेमतोमा अहिलेसम्म त्यो प्रक्रिया सुरु भएको छैन ।
अन्तर्राष्ट्रिय पर्यटन प्रवर्द्धन ठप्प पारेर वार्षिक २ अर्ब बजेट भएको बोर्डले कुनै काम गर्न सकेको छैन । बरु रेग्मीले उक्त रकममध्ये आधाभन्दा बढी हिनामिना गरिरहेको कर्मचारीहरूको दाबी छ ।
पर्यटन बोर्डमा विदेशी पर्यटकबाट प्रतिव्यक्ति एक हजार र ट्रेकिङ जाने पर्यटकले प्रतिव्यक्ति २० अमेरिकन डलर राजश्व तिर्छन् ।
