काठमाडौँ । अभिनेत्री केकी अधिकारी कविताको रियालिटी शो ‘पोयट आइडल’ को जज भएकी छिन् । केकीलाई पोयट आइडलको जज बनाइएसँगै सामाजिक सञ्जालमा निकै नै ट्रोल बनाइयाे ।
सामाजिक सञ्जालमा विभिन्न किसिमका टीकाटिप्पणी भइरहँदा केकी भने मौन बसेकी थिइन् । तर उनले आज पोयट आइडलद्वारा आयोजित औपचारिक पत्रकार सम्मेलनमा मुख खोल्दै कविताको मूल्याङ्कन गर्न सक्ने आत्मविश्वास प्रस्तुत गरिन् ।
हेर्नुहोस् यस्तो छ केकीले लेखेको कविता ‘गौशाला’ !
वाह ! स्याबास ! क्या बात !
उनी चुपचाप छिन् ।
केही थान सपनाहरू थाती राखेर
बटुल्दै छिन् औंस-औंस साहसहरू ।
पर कतै सुरिलो धुन बज्दा
गुनगुनाई दिउँ कि झैँ गर्छिन् ।
काठमाडौँको झिलिमिलीसँगै
नाचिदिउँ कि झैँ गर्छिन् ।
वाह ! स्याबास ! क्या बात !
भनिदिने कोही भैदिएको भए
असरल्ल कापीमा छरेर भावना
महाकाव्य नै पो लेख्थिन् ।
तर, लडाइँ बाँकी छ र पो
बबरमहल तिरै लडिरहेकी छिन्
उही हाम्री प्यारी
तिम्री मेरी ‘गौशाला’ ।
