काठमाडौँ । भारतको नयाँ दिल्लीबाट काठमाडौँका लागि उडेको जहाजमा बमको सूचना पाएपछि अहिले नेपाली सेनाले ‘सर्च’ गरिरहेको छ ।
भिस्तारा एयरवेजको जहाज अपराह्न साढे ४ बजे काठमाडौँस्थित त्रिभुवन अन्तर्राष्ट्रिय विमानस्थलमा अवतरण गरेको हो ।
नेपाली सेनाका प्रवक्ता एवं सहायक रथी गौरवकुमार केसीका अनुसार अहिले बम डिस्पोजल टोलीले विमानस्थलमा ‘सर्च’ गरिरहेको छ । तर अहिलेसम्म कुनै बमको संकेत पाइसकेको छैन ।
नागरिक उड्डयन प्राधिकरणका सूचना अधिकारी ज्ञानेन्द्र भुलका अनुसार बमबारे सूचना भारतीय नम्बरबाट ह्वाट्स एपमार्फत् आएको थियो ।
भारतीय नम्बरबाट भिस्ताराको ग्राउन्डमा सेक्युरिटी जाँच गर्ने कर्मचारीलाई भिस्ताराको दिल्ली-काठमाडौँको फ्लाइट नम्बर १५५ जहाजमा बम छ भन्ने सूचना आएको थियो ।
उक्त सूचना दिल्लीबाट उडिसकेको एक घण्टापछि ह्वाट्स एपमा आएको थियो ।
जहाजमा १५७ जना यात्रुहरू थिए। उक्त जहाजलाई अर्कै ठाउँमा राखिएको छ । अगाडि पछाडि कुनै जहाज वा अन्य गाडी राखिएको छैन ।
