काठमाडौँ । काठमाडौँ त्रिभुवन अन्तराष्ट्रिय विमानस्थल दैनिक १० घण्टा बन्द हुने भएको छ ।
विमानस्थलको स्तरोन्नतिका लागि आगामी शुक्रबार (नोभेम्बर ८) देखि करिब ५ महिनासम्म दैनिक १० घण्टा बन्द हुने भएको हो ।
बेलुका १० बजेदेखि बिहान ८ बजेसम्म ‘नोटिस टु एयर म्यान’ (नोटाम) जारी भएको छ । उक्त नोटाम जारी भएसँगै बुद्ध एयरले उडान निर्देशिका जारी गरेको छ ।
विमानस्थलको स्तरोन्नति पछि जहाजको आउजाउ तथा ट्राफिकमा धेरै सुविधा हुने बुद्ध एयरले जनाएको छ ।
बुद्ध एयरसँग धेरै जहाजहरू भए पनि कतिपय अवस्थामा प्रतिकुल मौसम तथा एयर ट्राफिकका कारण उडान प्रभावित हुने गरेका छन् ।
यस्ता कारणले यात्रुहरू टिकटमा उल्लेखित समयमै एयरपोर्ट चेक–इन काउण्टरमा रिर्पोटिङका लागि बुद्ध एयरले अनुरोध गरेको छ ।
यस्ता छन् बुद्ध एयरले जारी गरेको निर्देशिका
- यात्रुलाई हवाई टिकटमा उल्लेखित समयमै विमानस्थल चेकिङ काउण्टरमा रिर्पोटिङका लागि अनुरोध गरेको छ ।
- उडान समयभन्दा १५ मिनेट अगावै त्यस गन्तव्यको चेकिङ काउण्टर बन्द हुनेछ ।
- खराब मौसम तथा एयर ट्राफिकका कारण विमानस्थल ढिलो खुलेमा उडान रद्द हुने सम्भावना उत्तिकै रहेको छ । यस्तो भएमा सिट उपलब्धताको आधारमा अर्को दिनलाई ‘टिकट रिसेड्युल’ गरिने जनाएको छ ।
- उडान रद्द भएका टिकटहरूलाई ‘रिफण्ड प्रोसेसिङ’मा हालिनेछ । अनलाइन टिकेटिङको हकमा त्यहीबाट रिफण्ड हुनेछ। यसका लागि ३ देखि ४ दिनको समय लाग्नेछ। त्यसैगरी ट्राभल एजेन्सीबाट टिकट लिएकाहरूले त्यही सम्पर्क गर्न समेत अनुरोध गरेको छ ।
- एयर ट्राफिक तथा समय अभावका कारण उडान रद्द भएमा अर्को दिनलाई ‘डिले शेड्युल’ उपलब्ध गराइने छैन ।
- अन्तर्राष्ट्रियतर्फ कनेक्टिङ उडान हुने यात्रुले फराकिलो समयको अन्तर वा एक दिन अगावैको टिकट लिएमा थप सहज हुने एयरले जनाएको छ ।
प्रतिक्रिया दिनुहोस्
सम्बन्धित
