काठमाडौँ । होटलहरुले अब उद्योगको मान्यता पाउने भएका छन् ।
औद्योगिक व्यवसाय ऐन २०७६ को संशोधन गर्दै सरकारले तारे होटल र पर्यटन रिसोर्टलाई वर्गीकृत गरेको हो ।
अर्बौं लगानी गर्दै लाखौँलाई रोजगारी दिँदै आए पनि उद्योगको मान्यता नदिएको भन्दै वर्षौंदेखि सरकारसँग उत्पादनमूलक क्षेत्रमा पारिदिन लविङ भैरहेको थियो ।
मन्त्रिपरिषद्को बैठकबाट यो अध्यादेश पास भए पनि पारितका लागि राष्ट्रपति कार्यालयमा पठाउन बाँकी छ । यदि, मन्त्रिपरिषदले पठाएको प्रस्तावमा कुनै पनि फेरबदल नभई प्रमाणीकरण भए तारे होटल र पर्यटन रिसोर्टले उत्पादनमूलक उद्योगको मान्यता पाउने छन् ।
होटल क्षेत्रलाई उत्पादनमूलक उद्योगमा राख्ने प्रतिबद्धता भए पनि ऐन संशोधन हुन सकेको थिएन ।
सरकारले अहिले ऐननै संशोधन गरी तारे होटललाई उत्पादनमूलक उद्योगमा राख्ने र त्यहीअनुसारको सेवा सुविधा दिने व्यवस्था गरेको हो ।
