काठमाडौँ । संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले हिमाललाई जोगाउन सकिएन भने नेपालकै अस्तित्वमा प्रश्न उठ्ने बताएका छन् ।
एमएस म्युजिक एण्ड ईन्टरटेन्मन्टद्वारा आयोजित एभरेस्ट टुरिजम अवार्ड वितरण कार्यक्रमलाई सम्बोधन गर्दै मन्त्री पाण्डेले यस्तो बताएका हुन् ।
अवार्ड कार्यक्रममा १८ वटा देशका विदेशीहरूदेखि स्वदेशीहरूलाई विभिन्न विधाबाट सम्मान गरिएको थियो ।
उनले जलवायु परिवर्तनका कारण हिमालको अस्तित्वमा असर पर्दै गएको बताए ।
मन्त्रि पाण्डेले भने, ‘जलवायु परिवर्तनका कारण हिमालहरू काला देखिन थालेका छन् । हिमालको अस्तित्व जोगाउन सकिएन भने नेपालकै अस्तित्वमाथि प्रश्न चिन्ह उठ्न सक्छ ।’
प्रकृतिलाई जोगाउनु पर्ने चुनौती देखिएको उल्लेख गर्दै उनले जलवायु परिवर्तनका कारण मुलुक संकटमा पर्दै गएको चिन्ता व्यक्त गरे ।
मन्त्री पाण्डेले जलवायु परिवर्तनले नेपालमा परेको असरबारे सिंगो विश्व एक ठाउँमा उभिनु पर्ने समेत बताए ।
उनले हिमाललाई हिमालकै रूपमा रहन दिने गरी विश्व जगत एक ठाउँमा उभिनका लागि संयुक्त राष्ट्र संघ समेत चिन्तित हुनु पर्नेमा जोड दिनुपर्ने बताए ।
