सुर्खेत। प्राकृतिक र सांस्कृतिक रूपमा सम्पन्न भएर पनि ओझेलमा परेको कर्णालीको पर्यटनलाई अन्तर्राष्ट्रिय स्तरमा ब्रान्डिङ गर्न सुर्खेतमा ‘प्रथम कर्णाली पर्यटन सम्मेलन’ आयोजना हुने भएको छ।
नेपाल र भारतका पर्यटन व्यवसायी एवं लगानीकर्तालाई एकै ठाउँमा ल्याएर कर्णालीमा लगानीको वातावरण बनाउने उद्देश्यले यो सम्मेलन हुन लागेको हो।
नेपाल पर्यटन बोर्ड, वीरेन्द्रनगर नगरपालिका र होटल व्यवसायी महासंघ कर्णाली प्रदेशले संयुक्त रूपमा आगामी जेठ ९ देखि ११ गतेसम्म यस ऐतिहासिक सम्मेलनको आयोजना गर्दैछन्।
यस सम्मेलनको सबैभन्दा बलियो पक्ष भनेको छिमेकी मुलुक भारतसँगको क्रस बोर्डर कनेक्टिभिटी र पर्यटन साझेदारी हो। सम्मेलनमा भारतका तीन राज्यहरू उत्तर प्रदेश, उत्तराखण्ड र दिल्लीका पर्यटन व्यवसायी, लगानीकर्ता, ट्राभल एजेन्सी, टुर अपरेटर र पर्यटन विज्ञहरूको सक्रिय सहभागिता रहने सम्मेलनका संयोजक तर्कबहादुर शाहीले जानकारी दिए।
उनका अनुसार सम्मेलन नेपाल र भारतका व्यवसायीहरूबीच प्रत्यक्ष व्यावसायिक सम्झौता र सहकार्यका लागि बिजनेस टु बिजनेस छलफल हुनेछ भने पर्यटन विज्ञहरूसँग कर्णालीको दिगो पर्यटन विकासका चुनौती र सम्भावनाबारे प्राविधिक विमर्श हुनेछ।
त्यस्तै, विदेशी पाहुनाहरूलाई कर्णालीका पर्यटकीय स्थल र होटल पूर्वाधारको प्रत्यक्ष अवलोकन गराइने छ भने कर्णालीको रैथाने कला र संस्कृतिलाई विश्व बजारमा चिनाउने प्रस्तुतिहरू हुनेछ। ‘हामीसँग सम्पत्ति छ तर बजारसम्म पुग्न सकेका थिएनौँ,’ संयोजक शाहीले भने, ‘यो सम्मेलनले कर्णालीलाई अन्तर्राष्ट्रिय पर्यटन बजारसँग सिधा जोड्नेछ।’
